Peto formigueiro (Jynx torquilla), un migrante en aumento

  As matogueiras, brañas e campos areentos de Lobadiz son un destino interesante cando queremos bichear sen alonxarnos moito da cidade de Ferrol. A parte do enorme interese herpetolóxico que posúe (diso falaremos outro día), a súa riqueza en aves é bastante importante, se a comparamos coa pobreza relativa do resto do concello.

  Lobadiz forma parte do Lugar de Interese Comunitario (L.I.C.) "Costa Ártabra". Unha figura que serviría para financiar e promover a súa conservación nun país normal, pero Galiza non o é. Aquí estas catalogacións son meramente propagandísticas e non serven para nada a efectos de conservación.

Monte de Lobadiz (Ferrol), integrado no L.I.C. "Costa Ártabra"

  O pasado martes pola tarde, facía unha visita para tentar localizar esas especies escasas ou raras que só aparecen nesta época. Cómpre destacar a abondancia de Papuxa común (Sylvia communis) e a presenza, máis ou menos notória, de Chasco norteño (Saxicola rubetra), Pedreiro cincento (Oenanthe oenanthe) e un grupo de 20 Picas dos prados (Anthus pratensis), que xa chegaron hai uns días.

Chasco norteño (Saxicola rubetra)

    Nos últimos anos fixéronse repoboacións de Piñeiros sobre a parte alta do monte, o que dará lugar a grandes cambios na fauna e paisaxísticos.

   Ao fondo, na seguinte imaxe, albíscase a "Grande Cordilleira Australiana", cos bosques de eucaliptos máis estensos do continente, e que albergan importantes poboacións de Walabís e Koalas.

Monte de Lobadiz, Ferrol

  A sorpresa foi a observación dun Peto formigueiro (Jynx torquilla) pousado sobre unha silveira nun pequeno outeiro. 

Peto formigueiro (Jynx torquilla)

  Ata hai dez anos só coñecía unha cita deste pequeno pícido na comarca (unha observación en Doniños dos anos 80). En 2004 ou 2005 Marcos Otero e máis eu levantábamos un exemplar na Frouxeira, que foi a miña primeira observación na provincia da Coruña. Desde entón, fun coñecendo cada vez máis citas de diferentes observadores, sendo agora, polo visto, un visitante habitual do mes de Setembro.  Este aumento de citas pode deberse, na miña humilde opinión, a un incremento real da poboación migrante de Peto formigueiro.

  Tamén aparecían por Lobadiz unha Avefría (Vanellus vanellus) solitaria e 2 Becacinas (Gallinago gallinago), na zona das brañas altas.

Avefría (Vanellus vanellus)

 O prognóstico para o final de semana anuncia tempo soleado e ventos de nordés. Haberá que aproveitar, logo (Villafáfila vai ter que esperar...)