Lagoa da Frouxeira, 5 de Maio: águia pescadora (Pandion haliaetus)

   Finalmente o prognóstico meteorolóxico non se cumpríu e apenas houbo unha tarde-noite (onte) con nordés forte, rolando xa esta mañá a compoente sueste. En consecuencia o paso foi ben cativo tanto en cuantidade coma en especies. Ademáis a partir desta segunda feira mudará o tempo coa entrada dunha borrasca, así que podemos dar por rematado este "pico migratorio".

  Hoxe a primeira hora as limícolas estaban case todas a descansar nas rochas da canle. Coa baixada do nível foron alimentarse na lagoa.

 Limícolas nas rochas da canle

  Nestes afloramentos rochosos onde descansan as aves resulta imposíbel contalas por falla de visibilidade. Pola contra é moi doado fotografalas de perto movéndonos con coidado pois adoitan estar bastante confiadas (se non aparece a peste canina para asustar todo, por suposto)

 Virapedras (Arenaria interpres) en primeiro termo

   As cifras mantíñanse arredor dunhas 600 limícolas en total (un 10-20 % das que hai un día de paso forte, para que vos fagades unha idea). Entre elas 4 virapedras (Arenaria interpres) e 23 mazaricos rubios (Limosa lapponica).

  Coma onte, para a sesión fotográfica empreguei a bridge "full frame": Sony RX10 III, que dá moita máis cualidade en tomas de grupo ou panorámicas.

 Pilros tridáctilos (Calidris alba)

Sony RX10 III focal 206  (560 mm)  ISO: 160  V: 1/800   F: 5,6

 Pilros (Calidirs spp) e píllaras (Charadrius hiaticula) en vóo

  Aínda que para fotos lonxanas bótase de menos o zoom brutal das bridge pequenas.

 Pilros comúns (Calidris alpina)

Sony RX10 III focal 220 (600 mm)  ISO: 100  V: 1/800   F: 4,5 

 Virapedras (Arenaria interpres) na dereita da imaxe

Sony RX10 III focal 220 (600 mm) ISO: 125  V: 1/800  F: 5,6

 Mazaricos rubios (Limosa lapponica)

Sony RX10 III focal 125 (340mm)   ISO: 100  V:1/800    F: 4,5

  Ademáis de limícolas tambén había 1 cullereiro (Platalea leucorodia), 2 cercetas albelas (Anas querquedula) e 1 águia pescadora (Pandion haliaetus), rapaz cada ano máis frecuente nos pasos.

Águia pescadora (Pandion haliaetus)

  As aguias pescadoras adultas teñen un alto índice de éxito nas suas procuras de caza nesta lagoa. Habitualmente logran captura nuns poucos minutos despois de chegar á lagoa, para marchar logo a un lugar apartado no monte, lonxe dos corvos e gaivotas, onde alimentarse tanquila. Por iso é importante madrugar se queremos velas.

  Na Frouxeira sempre hai cousas que ver, como vedes.