Cambio de reflex!

  Coincidindo coa semana en que estou de cumpreanos, decidín facerme un pequeno agasallo, do que vós tamén vos veredes beneficiados.
  Hai tempo que vos comentara que tiña intención de cambiar de cámara reflex algún día, a ver se podía tirar mellor rendimento ao meu teleobxectivo, un Tamron SP-VC 70-300 que penso que ten que dar moito máis do que obteño coa miña cámara actual (unha Canon moi básica). Así que hoxe deume unha arroutada destas que me dan ás veces e acabo de subir un escalón na miña equipa fotográfica, adquirindo unha Canon de gama media.

  Logo de consultar co "oráculo" (unha aperta, Fer) e de mirar Internet, decidinme pola 60D. E son consciente de que non é un modelo de última xeneración, e que mesmo está quizá por debaixo da competencia, polo que lin dos expertos. Pero para min penso que é perfecta. Sobre todo porque é unha das poucas con pantalla abatíbel, unha condición imprescindíbel para o uso que eu lle darei (fotos de insectos, anfibios, flores, etc).

   Obviamente a técnica do fotógrafo tamén inflúe (e a miña é moi pobre), pero estou seguro que notaredes unha mellora moi importante en determinado tipo de fotos, como son as de aves en movimento ou en condicións de pouca luz. Por suposto seguirei usando a miña pequerrecha, pero esta mesma semana, a Praia dos Botes vai ser o escenario  das primeiras provas do meu novo xoguete.

PD: Tamén teño unha nova tarxeta, moito máis rápida, dacordo coas mellores prestacións deste modelo. A ver cómo vai.