Corvo mariño cristado (Gulosus aristotelis) xuvenil

  Onte ao mediodía saín do choio e achegueime até os peiraos de Fene, na banda sur da ría de Ferrol. Só tiña en mente facer probas coa Olympus e un xoven corvo mariño cristado ofreceuse voluntario pra pousaren.

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm (a 245 mm) ISO:320   V:1/125    F:7,1

Corvo mariño cristado coa cidade de Ferrol no fondo

   Na Península existen dúas subespecies: G.a. aristotelis, presente na costa atlántica, e G.a.desmarestii, na mediterránea. A primeira experimentou un forte declinio nos últimos anos, de até un 59% na poboación do P.N. das Illas Atlánticas (1). En Galiza pasou de 2400 parellas censadas no ano 2004 a só 1408 en 2017 (2).

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm (a 300 mm) ISO:500   V:1/160    F:6,3

   Os expertos indican diferentes problemas de conservación da especie: artes de pesca como os trasmallos, contaminación por hidrocarburos, predación por especies invasoras (gatos ou visón americano), molestias por actividades humanas ou inclemencias meteorolóxicas (3).

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm (a 245 mm) ISO:400   V:1/200    F:6,3

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm   ISO:500   V:1/320    F:6,3

   Este xuvenil probablemente teña nacido nalgunha das colonias da comarca de Ferrol. Durante os programas de anelamento comprobouse que os exemplares xóvenes realizan desprazamentos medios de 20 Km logo da tempada de reprodución. Desfrutemos da sua presenza mentras podamos, pois xa está catalogado coma "En perigo" no libro vermello de especies ameazadas.

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm   ISO:320   V:1/100    F:7,1

  Esta coca (un nome local que ten por aquí) mostrábase moi confiada e permitíu que me acercase no carro, moi amodiño,  case ata poder tocala coa man, literalmente. A seguinte foto non foi sacada co teleobxectivo, senón cun obxectivo curto pensado para paisaxes!.

Corvo mariño cristado (Gulosus aristotelis) xuvenil

Olympus OM-1 + Panasonic 14-42 mm (24-84 mm equiv)   ISO:250   V:1/320    F:5,6

  Deume tempo a todo tipo de probas. Por exemplo a estabilización do Zuiko, con disparos a velocidades de obturación tan lentas coma 1/60 seg, logrando imaxes con cero trepidación, aínda que non podía meter moita focal ou saíase do encuadre de tan perto que estaba. Pena de luz tan mala.

Corvo mariño cristado (Gulosus aristotelis) xuvenil

Olympus OM-1 + Zuiko 100-400 mm  (focal 245 mm)  ISO:200   V:1/60    F:8

Recurte da imaxe anterior

    Este corvo mariño cristado non ten o glamour dos Bombycilla eses que están a provocar auténticas romarías de coleccionistas provintes de toda España, pero é unha das nosas xoias faunísticas. Unha xoia cuxo estudo e censo non ha ser nada doado. Vaian os meus parabéns para todos os involucrados nas publicacións citadas.

(1) Atlas SEO-Bird Life (censo 2017)

(2) El Cormorán moñudo en Galicia. Población reproductora en 2017 y método de censo. Ignacio Munilla & Álvaro Barros 2018

(3) Álvarez, D. e Velando, A. 2007. El cormorán moñudo en España. Población en 2006-2007 y método de censo. SEObirdlife. Madrid.