Terra Chá: gansos de testa branca (Anser albifrons)

  Finalmente non vin folerpas onte na Terra Chá (si deberon caer esta madrugada). A pesares do sensacionalismo dos medios foi unha mañá fría, sen máis: -1,5ºC de mínima e subindo rápidamente; nada que ver cos días de xeada forte que teño collido por aló.

  Por desgraza a perda de biodiversidade segue a ser galopante. Realicei dous transectos mixtos carro/a pé, primeiro na Espiñeira (Cospeito) e logo na Veiga de Pumar (Castro de Rei). Podedes ver as listaxes completas en eBird (Espiñeira e Veiga de Pumar).

Macizo do Xistral, cun pouco de neve e un moito de eólicos/eucaliptos

OM-1 + Zuiko 300 mm + MC1,4x  f:5,6   ISO:200   V:1/1250   F:7,1

   Especialmente chamativa é a case desaparición de avefrías (Vanellus vanellus). En invernos suaves sempre había grupos de deceas de exemplares coma mínimo, que eran centos en invernos normais, e millares en invernos fríos. Onte non vin ningunha (sei dalgunha cita doutros observadores).

  A píldora dourada (Pluvialis apricaria) non era tan abondosa como a avefría. Porén, eu diría que nos últimos anos vese con maior facilidade. Onte había 11 exemplares na Veiga.

Píldoras douradas europeas (Pluvialis apricaria)

OM-1 + Zuiko 300 mm + MC1,4x  f:5,6   ISO:400   V:1/1250   F:6,3

    Unha evolución inversa experimentou a garza branca grande. Do mesmo xeito que se fai normal ver a especie nas rías, segue a parecerme "exótico" atopalas en plena campiña luguesa.

Garza branca grande (Ardea alba) na Veiga de Pumar

OM-1 + Zuiko 300 mm + MC1,4x  f:5,6   ISO:200   V:1/1000   F:6,3

  O mais salientábel foi a observación dun grupo de 7 gansos de testa branca (Anser albifrons)  descansando moi tranquilos na Veiga de Pumar. Había tempo que non observaba este bonito ganso.

Gansos de testa branca (Anser albifrons)

OM-1 + Zuiko 300 mm f:4   ISO:200   V:1/320   F:5

Gansos de testa branca (Anser albifrons)

OM-1 + Zuiko 300 mm f:4   ISO:200   V:1/320   F:5

Gansos de testa branca (Anser albifrons)

OM-1 + Zuiko 300 mm f:4   ISO:200   V:1/250   F:5

    O día estaba  nuboso mas xusto neses momentos facía sol e a contraluz era moi intensa. Estivemos un bon rato observándonos mutuamente os gansos e mais eu, mentras agardaba a que unha nube xenerosa ocultara ese sol tan inoportuno.

Gansos de testa branca (Anser albifrons)

OM-1 + Zuiko 300 mm + MC1,4x   f:5,6   ISO:400   V:1/320   F:8

  Por fin, anubouse un momento e aproveitei para sacar unha toma mellor exposta.

Gansos de testa branca (Anser albifrons)

OM-1 + Zuiko 300 mm + MC1,4x   f:5,6   ISO:400   V:1/320   F:7,1

  Na Espiñeira sorprendeume a ausencia de frinxílidos, con moi poucos exemplares observados para o que adoita ser común nestas alturas; ainda que vin tres pimpíns do norte. Na Veiga de Pumar xa atopei un bando decente duns 500 individuos, entre verderolos, liñaceiros, xílgaros, pimpíns comúns e, cando menos, 4 pimpíns do norte.

Verderolos europeos (Chloris chloris)

Pimpín do norte (Fringilla montifringilla) no centro da imaxe

  Agora non me complico a vida cando vexo grupos de paxaros pousados nas árbores. Ademáis se saes do carro co telescopio para os identificar é bastante probábel que fuxan todos asustados. Prefiro quedar no veículo e disparar "a lo loco" coa cámara. Logo miro tranquilamente as fotos na casa para ver o que hai e contalos se procede. E así rematamos por hoxe.