Lacerta schreiberi, muda completa

    Ben, como ún debe ser o primeiro en practicar o que predica, esta mañá facía outra cuadrícula para o famoso Atlas de aves reprodutoras, acompañado de Pepe Vidal. Nesta ocasión fomos a NJ72, que colle varios concellos e inclue o encoro das Forcadas onde, por certo, haberá que facer tamén o censo de Galiñolas (Fulica atra), ave do ano 2014 e que mostra un alarmante declive poboacional que nos ten a todos moi preocupados. Sobre isto recoméndovos o blogue de Xabi Varela, que vén de facer unha interesante entrada sobre a situación na comarca coruñesa (Birdwatching en la esquina noroeste).

  O máis importante foi comprobar que aínda temos Escribentas marelas (Emberiza citrinella) na comarca de Ferrol. As últimas parellas reprodutoras manteñen aínda unha interesantísima poboación nos altos que limitan os concellos de Valdoviño, Narón e San Sadurniño. Estes outeiros e montes, situados arredor da cota 250-300 m. de altitude, son a localización máis próxima ao litoral ferrolán que coñezo. Tirei varias fotos pero non me convenceron para publicar.
   Aproveito para recomendarvos unha visita ao blogue de Miguel (El Ornitoblog). Se queredes desfrutar coas prestacións das cámaras bridge e coa natureza de Castela, non teredes mellor sitio. Este rapaz é un auténtico crack.

  Tamén puiden anotar varias citas de anfibios mortos na estrada, pero todos eles xa estaban citados na cuadrícula e non aportaban nada (Rana temporaria e Salamandra salamandra, ambas moi abondosas na zona).

  Á volta, paramos en Taraza a ver se sabíamos algo máis da nosa Folosa (Locustella naevia). Pero hoxe, para variar, facía un vento do demo, e así é máis difícil aínda detectar a especie. Así que case voltamos de balde. Digo case, porque este Lagarto das silvas (Lacerta schreiberi) nos alegrou un pouco a visita a Taraza.

   Nestes días, a muda xa finalizou, e o lagarto amosa as súas galas máis fermosas. É certamente un animal fotoxénico coma poucos.

 Vémonos.