As Forcadas, visita de control 23/07/2019

NOTA: Fixen dous pequenos cambios no blogue. Por unha banda instalei de novo o buscador no blogue, que agora tedes á vosa disposición encabezando a coluna de gadgets á dereita da pantalla. para cando queirades buscar un contido concreto.
Por outra banda habilitei moderación de comentarios, como filtro anti-trolls. E recomendo asinar os comentarios con nome e apelidos, como as persoas, porque tamén estou farto dos malditos anónimos. Bichos é un blogue serio.

  Esta mañá voltaba ao encoro na compaña de Pepe Vidal. Logo dun par de días bastante calorosos hoxe volvían os ceos cubertos con nubes baixas e néboas. Por outra banda a presenza cada vez maior de pastores eléctricos (polas vacas ceibes e contra o xavalí) fan tamén máis complicada a mostraxe da ribeira. Lugares onde antes podías chegar ben agora son imposíbeis. Unha pena.

 Pastor eléctrico (e silveira detrás) que impeden o acceso a un ponto moi rico en odonatos

   Os corzos parecen coñecer ben os puntos de paso onde non hai estes pastores ou onde os poden saltar. No mesmo lugar onde vin a corza o outro día sorprendíamos hoxe este macho.

 Corzo no seu hábitat

  Disparei sen pensar, antes de que saltara.  Nin me decatei que tiña o zoom nunha focal moi corta, equivalente a só 247 mm! (imaxinade o perto que estaba o bicho)

Corzo (Capreolus  capreolus)

Sony RX10 focal 90 (247 mm)  ISO:  400  V: 1/500  F: 5,6

  Este ano estou a realizar un novo censo de parellas reprodutoras das pocas acuáticas que fican. A falta dun balanzo final contrastando os dados semella que os mergullóns pequenos (Tachybaptus ruficollis) manteñen unha poboación arredor das 10 parellas, por unhas 6-8 de cristados (Podiceps cristatus).

  Ademáis hoxe vimos:

• 1 Garza denoiteira (Nycticorax nycticorax) adulta, un ardeido rarísimo décadas atrás que cada ano resulta máis regular durante os pasos migratorios na comarca de Ferrol
• 1 Cerceta (Anas crecca, imaxino) probablemente en muda e que leva días aquí
• 3 Miñatos abelleiros (Pernis apivorus)
• 2 Rascóns (Rallus aquaticus) escoitados
• 3 Biluricos alinegros (Tringa ochropus) 

 Mergullón cristado (Podiceps cristatus) en niño

 Polo de mergullón cristado comendo paliños de caranguexo

  De odonatos a cousa está moi frouxa (como todo por estas degradadas terras). Aínda que puiden "afotar" un Emperador pequeno (Anas parthenope). A foto é horrible e non serve para publicar no blogue mas penso que pode servir para a web de biodiversidade. Esta donceliña de copa quedou bastante mellor:

Donceliña  de copa (Enallagma cyathigerum)

Sony RX10 III focal 220 (600 mm)  ISO: 1250  V1/ 200 F: 4

  E me despido con ún dos achádegos máis estranos que levo atopado na miña experiencia de campo:

Pata de can

 Unha pata de can no medio dun prado recén segado. Dinlle moitas voltas e só se me ocorre unha explicación, que algúns imaxinaredes (a causa que imaxino está presente na zona).

  Ben, grazas a todos e todas por seguirme.