A Xunta abre a canle na Frouxeira

Onte avisábame Antonio da apertura da lagoa ao mar, realizada pola Xunta. Unha actuación que xa tardaba, desde o noso ponto de vista.

  E, de novo, o trazado escollido polos técnicos é o mesmo ca nos dous invernos anteriores. Un trazado que busca evitar o baleirado das augas da lagoa e que algúns consideran o orixinal. Na seguinte foto correspóndese co trazo vermello, en comparación co azul claro, que foi por onde abreu espontáneamente (igual me pasei coas proporcións, non fagades moito caso; o Paint no é o meu)

  O máis probable agora é que ocorra o mesmo que hai un ano. Daquela o propio mar fechou esta canle en cuestión de días. E, mentras os operarios de Tragsa intentaban restaurala, ela soa abreu polo outro sitio e baleirou completamente, deisxando o operativo da Xunta á altura do betún por segundo ano consecutivo. Pero din que non hai dous sen tres.

 A semana que vén, polo visto, vaise apresentar o famoso (e esperado) plano de actuacións para a conservación da lagoa, deseñado polos expertos da Xunta. Non sei se lle teño máis medo a este plano ou ao plano de viabilidade que nos vai presentar Navantia aos traballadores o día 4. Case que ao da Frouxeira, tendo en conta quen anda polo medio...

 Pero, a pesar do meu carácter rebelde e contestatario, gardo aínda un chisco de esperanza neste asunto... Logo de ver algunhas restauracións de humidais por aí fóra (como a estupenda de La Nava, en Palencia) digo eu que algún día seremos capaces de facer algo ben en Galiza. Quero pensalo.