Lista de aves observadas hoxe nos solares de Navantia-Ferrol

   As aplicacións para móbel son moi prácticas á hora de anotar observacións en lugares onde normalmente non o farías. Por exemplo na túa empresa. Agora que a teño instalada aproveito moitos desprazamentos que fago pola factoría de Navantia para recoller de maneira sistemática as aves que viven no asteleiro. 

  Esta mañá realizaba un transecto polos solares que hai detrás da zona de gradas. Unha zona de terreos baldíos que probablemente desaparecerá cando se constrúan as novas instalacións, que inclúen un enorme dique cuberto con guindastres tipo pórtico. Por certo, será unha obra moi necesaria para manter a competitividade de Navantia no mercado.

Vista dos solares de Navantia en google maps

 Non tirei fotos de paisaxe mas si vos poño a imaxe que aparece no transecto subido a ebird. Básicamente é un solar industrial, con vexetación de mato e manchas de salgueiral, con algún pe de chopo maduro, especialmente no bordo que linda coa escola de especialidades da Armada.

Itinerario marcado en ebird

  Neste percorrido de hoxe tiven un resultado de 22 especies de aves observadas, todas reprodutoras. Non está nada mal para tratarse dunha grande factoría industrial. No canto de escreber as especies unha a unha, moito mellor ollade o listado que copiei da aplicación:

  De regalo, atopaba pegadas de raposo (Vulpes vulpes) que forma parte xa da fauna do asteleiro, onde teñen entrado tamén corzo (Capreolus capreolus) e porco bravo (Sus scrofa).

  Resulta paradóxico que o número de especies sexa parecida ou mesmo superior ao de moitos transectos realizados habitualmente por espazos naturais, o cal indica o enorme grao de deterioro dos mesmos. Porén, é moi agradable desfrutar desta riqueza ornitolóxica na Bazán, como aínda dicimos os veteráns do lugar.