Outra sesión de odonatos no Basteiro

  Agora en Navantia temos a posibilidade de solicitar a "xornada flexible", un dereito que xa tiñan noutras grandes empresas da Industria (para min supón ún dos mellores artigos de Convenio nos 37 anos que levo aquí). Permite unha certa flexibilidade na hora de entrada (dúas horas), sempre respetando o tempo da xornada diaria.

  Por iso cando me apetece bichear ao mediodía entro na factoría o máis cedo posíbel pra poder dar un paseo e publicar algo pola tarde. Hoxe tocaron as libeliñas do Basteiro (Neda).

Lavacú estriado (Sympetrum striolatum)

OM-1 + Zuiko 300 mm  f:4  ISO:200   V:1/1000   F:4

   Estes días temos unha emerxencia importante de lavacús estriados, o sympetrum máis abondoso alí, semella. Con eles estiven a practicar o enfoque de seguemento en voo, ao que xa vou collendo a agulla de marear. É fundamental empregar todos os pontos de foco da pantalla e fixar a distancia de enfoque no rango menor: 1,4-4 m.

Lavacú estriado (Sympetrum striolatum)

OM-1 + Zuiko 300 mm  f:4  ISO:200   V:1/1000   F:4

  Podía escoller unha velocidade de obturación digamos "lenta" para que as ás ficasen completamente borrosas ou subir a unha velocidade extremadamente rápida para conxelar o movimento. A final nen fixen unha cousa nen a outra, e non me convence o resultado (aínda por riba con eses fondos tan feos). Polo menos o corpo do bicho vese moi ben cara a identificación de especie.

Lavacú estriado (Sympetrum striolatum)

OM-1 + Zuiko 300 mm  f:4  ISO:200   V:1/640   F:4

     Cos gaiteiros forestais estiven a probar composición en estático. No medio dos felgos, con tanto xogo de luces e sombras, non é doado para un principiante coma min.

Gaiteiro forestal (Chalcolestes viridis)

OM-1 + Zuiko 300 mm  f:4  ISO:200   V:1/400   F:4

 

   Esta quedou escura dabondo... Aclareina un pouco dixitalmente.

Parella de gaiteiros forestais copulando

OM-1 + Zuiko 300 mm  f:4  ISO:400   V:1/1000   F:4

     Ésta xa ficou máis nítida e mellor exposta.

Parella de gaiteiros forestais copulando

OM-1 + Zuiko 300 mm  f:4  ISO:800   V:1/250   F:6,3

  A distancia focal do Zuiko 300 mm resulta perfecta para insectos grandes como libeliñas (as imaxes teñen un recurte lixeiro).  Tamén para hérpetos de pequeno tamaño, como estas lagartixas galegas que atopaba nun muro de pedra.

Lagartixa galega (Podarcis bocagei)

OM-1 + Zuiko 300 mm  f:4  ISO:200   V:1/500   F:4

Lagartixa galega (Podarcis bocagei)

OM-1 + Zuiko 300 mm  f:4  ISO:200   V:1/500   F:4

  Un campo éste da herpetoloxía que teño moi abandonado últimamente. Coma tantas outras cousas que tamén teño abandonadas, desde tarafeas domésticas a relacións sociais ou actividades diversas. Unha depresión severa non é unha broma e custa saír á superficie a respirar. Especialmente cando a persoa que tes ao carón tamén está afogando e te colle polo brazo pedindo socorro. Cousas de Ferrol.