Bichos e demais familia: 14/03/2026 Lagoa da Frouseira

sábado, 14 de marzo de 2026

14/03/2026 Lagoa da Frouseira

A mañá do sábado voltei por Valdoviño, onde había temporal no mar.

Mar de Valdoviño

Na lagoa da Frouseira a cousa estaba máis calma.

Lagoa de Valdoviño

Como xa expliquei, agora adoito ir coa cámara coma única óptica. O prognóstico anunciaba chuvia (que comezou cando marchaba) así que deste vez tampouco levei o telescopio. Así e todo fixen unha listaxe completa (preme), que se complementa coa que Pablo Vázquez e Antón Rivera subiron algo máis tarde (preme). Eles sacaron limícolas que eu non detectei.

Poño o que eu vin (sen paxaros terrestres):

1 Cisne mudo (Cygnus olor)
4 Culleretes boreais (Spatula clyupeata)
Deceas de patos cincentos (Mareca strepera)
Deceas de lavancos reais (Anas platyrhynchos) xa moi dispersos
165 Cercetas eurasiáticas (Anas crecca) aprox, contadas co teleobxectivo da cámara
5+ Biluricos das rochas (Actitis hypoleucos)
1 Virapedras (Arenaria interpres)
1 Gaivota pequena (Hydrocoloeus minutus). Leva tempo aquí
60+ Gaivotas choronas (Chroicocephalus ridibundus). Estaba a realizar un conteio preciso mas apareceu unha aguia pescadora e levantou todo
+ Gaivotas patiamarelas (Larus michahellis)
3 Mergulletes comúns (Tachybaptus ruficollis)
21 Corvos mariños grandes (Phalacrocorax carbo)
7 Cullereiros (Platalea leucorodia)
2 Garzas brancas pequenas (Egretta garzetta)
2 Garzas reais (Ardea cinerea)
1 Aguia pescadora (Pandion haliaetus)

Os lavancos reais xa comezaron a tempada de cría. Os primeiros pitos soen aparecer cara finais de abril pero xa os teño visto en marzo algún ano. Agora é doado ver adultos en terra, por veces en lugares bastante insólitos. Úns dos lugares favoritos son a pista e o paseo peonil que van paralelos á lagoa, onde nesta época os lavancos consomen moitas sementes dunha gramínea abondosa alí.

Lavanco real (Anas platyrhynchos) papando "gramínea sp"

OM-1 + Zuiko 300 mm f:4 ISO:1600 V:1/100 F:5

O máis alucinante é que nestas alturas os lavancos vólvense moi mansos e confiados. Podes achegarte a eles a distancias incríbelmente curtas. Dalgunha maneira acostumáronse á xente que camiña a diario polo paseo peonil, comportándose case coma patos domésticos nun parque. Supoño que a proibición da caza hai corenta anos tivo moito a ver con isto.

Lavanco real (Anas platyrhynchos) femia

OM-1 + Zuiko 300 mm f:4 ISO:3200 V:1/125 F:5

Lavanco real (Anas platyrhynchos) macho

OM-1 + Zuiko 300 mm f:4 ISO:3200 V:1/125 F:5

Como dixen non levei "armamento pesado", moi necesario para observar acuáticas pequenas no intermareal. Si contei (aproximadamente) as cercetas, a maioría no sector NW.

Cercetas eurasiáticas (Anas crecca)

OM-1 + Zuiko 300 mm f:4 ISO:1600 V:1/320 F:5

Estaba a censar tamén as gaivotas choronas e tireilles unhas fotos por ver o número.

Bando de gaivotas choronas (Chroicocephalus ridibundus)

Xa na casa e cando revelaba as imaxes descobrín que no medio do grupo estaba a famosa gaivota pequena que levan observando desde hai tempo. Se non chove moito igual volto mañá para tentar collela ben (dan orballo).

Gaivota pequena (Hydrocoloeus minutus)

Unha mañá agradábel só enturbiada polos de sempre. Concretamente polo de sempre: un individuo que leva un rotweiller sen buceira e a miúdo sen correa, coma foi hoxe. Segundo a lei woke as mascotas forman parte da unidade familiar, así pois non hai nada que facer. Evidentemente que ese individuo faga iso todos os días non ocorre sen complicidade social, política e policial.