Control na lagoa da Frouseira e cercetas albelas (Spatula querquedula)

  Esta fin de semana tocou visitar a lagoa de Valdoviño. O sábado con bastante vento, na xornada dominical con frío e chuvia. 

Gaivotas escuras (Larus fuscus)

OM-1 + Zuiko 300 mm f:4  ISO:800   V:1/500   F:5

  Poño o máis interesante do observado:

• 5 Cercetas albelas (Spatula querquedula)
• Deceas de patos cincentos (Mareca strepera), xa en celo evidente 
• Arredor dun cento de lavancos reais (Anas platyrhynchos), por dicir un número. Entre eles unha parella con 14 pitos de poucos días. A primeira rolada da temporada na Frouseira, en datas habituais
• 1 Pato rabilongo (Anas acuta). Observado únicamente o sábado
• 26-30 + Cercetas eurasiáticas (Anas crecca). Bastantes para estas alturas do ano
• 2 Zurrascas eurasiáticas (Rallus aquaticus) escoitadas
• 2 Píldoras cincentas (Pluvialis squatarola)
• 2 Mazaricos chiadores (Numenius phaeopus)
• 10 Biluricos das rochas (Actitis hypoleucos)
• 1 Bilurico pativerde (Tringa nebularia)
• 1 Pilro común (Calidris alpina)
• 150 Gaivotas escuras (Larus fuscus) contadas o sábado
• 2 Cullereiros comúns (Platalea leucorodia) o sábado
• 1 Tartaraña das xunqueiras (Circus aeruginosus). Por certo, teño unha visita pendente a Ribadeo. A ver se saco tempo pra iren (vou ter os próximos findes bastante ocupados)
• + Folosas das canaveiras (Acrocephalus sirpaceus) cantando nos lugares habituais
• 1 Lavandeira amarela (Motacilla flava) no illote da Lapela, onde aniña desde hai moitos anos. Coma no caso das folosas, supón a primeira cita propia este ano

  Tiña moitas ganas de fotografar a cerceta albela co novo equipamento, cousa que logrei en ambas as xornadas, mais perto hoxe domingo. As tomas do sábado tiven que recurtalas un pouco.

Cerceta albela (Spatula querquedula) macho

Macho de albela en primeiro plano e femia ao fondo

Cerceta albela (Spatula querquedula) macho. Toma con recurte

OM-1 + Zuiko 300 mm f.4   ISO:800   V:1/640   F:4,5

   A cerceta albela, ao igual que a común, aliméntanse filtrando en augas superficiais para coller diferentes organismos, tanto vexetais como animais (invertebrados). E faino movendo a cabeza moi rápido. Se engadimos que é un pato bastante fuxidío, mais tímido que lavancos ou cincentos, resulta un bicho de fotografía complicada.

     Se ademais acoplamos o teleconvertidor MC1,4x pois hai que subir mais a velocidade de obturación. E con este tempo invernal estaba todo moi escuro. Houbo hoxe un rato no que había mellor luz, xusto cando comezou a chover. Algunhas destas fotos foron feitas mentras sostiña o paraugas e a cámara a un tempo, como podía...

Cerceta albela (Spatula querquedula) baixo a choiva

OM-1 + Zuiko 300 mm f.4 + MC1,4x (f.5,6)    ISO:1600   V:1/400   F:6,3

Cerceta albela (Spatula querquedula) alimentándose

Cerceta albela (Spatula querquedula) alimentándose

OM-1 + Zuiko 300 mm f.4 + MC1,4x (f.5,6)    ISO:1600   V:1/500   F:6,3

     A cerceta albela é unha das anatídeas máis peculiares da nosa fauna. Por un sinxelo motivo: están presentes únicamente na pasaxe de primavera, de marzo a abril (mais raramente até maio). Sendo a maioría dos nosos patos aves invernantes nos nosos humidais - ou sedentarios no caso dos lavancos e cincentos reprodutores - a cerceta albela é a única especie cuxa aparición se limita a un período tan breve de tempo, como norma xeral. O pato rabilongo tamén sedimenta na Frouseira durante o paso de primavera, pero o seu continxente é maiormente invernante no noso país.

Cercetas albelas (Spatula querquedula) 

OM-1 + Zuiko 300 mm f.4 + MC1,4x (f.5,6)    ISO:800   V:1/320   F:6,3

  Todas as imaxes deste post foron sacadas, penso, cunha velocidad algo lenta para os espasmódicos movimentos das cercetas. Non quería subir moito a sensibilidade. Por iso algunhas fotos saíron movidas ou con lixeira trepidación (que falamos dunha focal de 840 mm equivalentes cos bichos a 30-50 m).

Cercetas albelas e lavancos reais

OM-1 + Zuiko 300 mm f.4 + MC1,4x (f.5,6)    ISO:800   V:1/200   F:6,3

Cercetas albelas e lavancos reais 

OM-1 + Zuiko 300 mm f.4 + MC1,4x (f.5,6)    ISO:1600   V:1/500   F:7,1

Cerceta albela (Spatula querquedula) macho

OM-1 + Zuiko 300 mm f.4 + MC1,4x (f.5,6)    ISO:1600   V:1/500   F:6,3

Cerceta albela (Spatula querquedula) femia

OM-1 + Zuiko 300 mm f.4 + MC1,4x (f.5,6)    ISO:1600   V:1/400   F:7,1

Cerceta albela (Spatula querquedula)

OM-1 + Zuiko 300 mm f.4 + MC1,4x (f.5,6)    ISO:800   V:1/250   F:6,3

Cerceta albela (Spatula querquedula)

OM-1 + Zuiko 300 mm f.4 + MC1,4x (f.5,6)    ISO:800   V:1/250   F:6,3

    Bon, tardábame facer unha sesión fotográfica con esta anatídea tan característica da Frouseira nestas alturas. É certo que o tempo non colaborou mas as cercetas si, ficando relativamente perto para tratarse desa especie tan desconfiada. Doume por satisfeito... até o ano que vén.

PD: Por suposto gardarei os RAW e estou completamente seguro que dentro duns anos non gostarei nada de como os revelei para esta entrada e volverei publicalos cunha mellor edición. Como me pasa agora con algunhas fotos de antes. O equipo que teño é PRO, pero eu non.