Hoxe foi o terceiro día consecutivo con alerta vermella por ondas no mar de 8-10 m e por ese motivo esta mañá facía unha visita rápida aos peiraos de Maniños e Mugardos.
Os corvos mariños grandes están a mudar a penaxe de inverno e xa amosan as típicas áreas brancas en patas ou gorxa, así coma ese ton acastañado no lombo. Sen embargo o que eu buscaba hoxe eran aves peláxicas coma falaropos (Phalaropus sp), araos (Alcidae sp), paíños (Hydrobates sp) ou mascatos (Morus bassanus), que adoitan entrar na ría canda os temporais.
Non levei o telescopio mas fixen unha boa mostraxe nos lugares onde adoitan aparecer estas especies, con resultado negativo. Poño unhas fotos de arquivo.
Desde logo a ría de Ferrol non é das mellores para observar aves peláxicas. Na miña opinión pola bocana tan cativa que posúe. De todas as rías galegas (con calado de máis de 10 m e navegábeis para buques grandes) é a que ten a entrada máis angosta, con moita diferenza. Nada que ver coas enormes Rías Baixas ou coa pequena Ría de Cedeira, moito máis aberta ao mar de fóra.(1)
.jpeg)
.jpg)
Ben, como dicía anteriormente, a invernada de acuáticas vai rematando cuns resultados moi pobres, como é cada día máis habitual. Este ano e logo dun dos temporais marítimos máis persistentes que eu lembro nin sequer as mariñas apareceron. A verdade é que contaba polo menos cos paíños, que si se viron noutras localidades galegas. Outra vez será.
(1) Non conto rías coma Ponteceso, Foz ou Ortigueira, que son maiormente áreas estuarinas con grandes intermareais e con menos de 5 m de fondo.
Ningún comentario:
Publicar un comentario
Para comentar es necesario identificarse con nombre y apellidos