Achegámonos ao solsticio de inverno e os días son cada vez máis curtos. Ás 8,00 h era case de noite na ribeira. Deume un ataque de fotógrafo e fixen unhas humildes composicións cos reflexos das luces na auga da ría:
A verdade é que puiden pechar un pouco o diafragma (despistes do momento). Esperaba ter que reducir moito grano nas zonas de sombra mas atopei moi pouco durante o revelado.
Coa Olympus OM-1 podes sacar fotos de máxima calidade até ISO1600. Coa Sony RX10 III nese rango de sensibilidade as eivas de detalle ou ruido son moito máis patentes pero poden tomarse fotos moi válidas a pouco que as editemos. Mesmo a ISO3200, se o bicho está perto.
E agora inauguramos nova sección en Bichos: "Restaurando fotos antigas". Nesta sección imos ver fotos xa publicadas no seu momento das que tiven o bon xuízo de gardar unha copia en RAW. Eses RAW, editados agora con todo o que aprendín e co novo software, han quedar moito mellor que cando as publiquei. Hoxe comezamos cun clásico da ría de Ferrol: a mobella grande.
Poño unha serie tomada na ría de Ortigueira en decembro de 2015, hai case dez anos. Tiradas cunha das miñas queridas Canon SX (a SX60 concretamente), unhas cámaras que adoro e que sempre recomendei a todos os que me preguntaban por modelos bridge para mercar.
Por desgraza teño moitas fotos das que só gardei recurtes JPEG. Algunhas delas realmente boas e mesmo irrepetíbeis. Afortunadamente entroume o sentido común e comecei a gardar os RAW daquelas tomas que resultaban de interese. Unha sabia decisión.
Ningún comentario:
Publicar un comentario
Para comentar es necesario identificarse con nombre y apellidos