31/08/2025 Visita de control en Forcadas: combatentes, biluricos de ás negras, etc

   Estamos na mellor época do ano para visitar o encoro das Forcadas (Valdoviño), alomenos no relativo ás aves migrantes. Por desgraza facer mostraxes alí está cada día máis complicado. Hoxe nen sequer puiden chegar á parte final da cola de Vilaboa, o meu lugar favorito. Había vacas pacendo na finca pola que tes que cruzar, e os pastores tiñan corrente, como puiden comprobar persoalmente. Únicamente censei desde pontos accesibles para cubrir a superficie que aparece no mapa:

Mapa do encoro das Forcadas. En círculo azul, as áreas censadas hoxe

   O nível hídrico está bastante baixo e iso favorece a sedimentación de limícolas.  Aquilo non é O Grove, obviamente, pero ten algunhas "especialidades" interesantes.

Ribeira das Cortiñas

Enseada do Pereiro

Sony RX10 III (focal 46 mm)   ISO:200   V:1/160    F:5,6

Cola de Vilaboa

Sony RX10 III (focal 44 mm)   ISO:200   V:1/200    F:4,5

  O encoro está moi degradado e aínda por riba só cubrín as zonas más accesible. Nesta área prospectada observei o seguinte:

• 24 Lavancos reais (Anas platyrhynchos)
• 6 Cercetas (Anas crecca)
• 4 Píllaras reais (Charadrius hiaticula)
• 3 Biluricos das rochas (Actitis hypoleucos)
• 4 Biluricos de ás negras (Tringa ochropus). Non vin ningún T. glareola
• 1 Bilurico común (Tringa totanus)
• 1 Bilurico pativerde (Tringa nebularia)
• 5 Combatentes (Calidris pugnax)
• 1 Pilro común (Calidris alpina)
• 11 Mergulletes comúns (Tachybaptus ruficollis). Case todos adultos
• 1 Corvo mariños grande (Phalacrocorax carbo)
• 5 Garzas reais (Ardea cinerea)

Combatentes (Calidris pugnax) e biluricos (Tringa spp)

     Por desgraza as "limis" estaban moi lonxe. Cada día boto máis de menos a Nikon P1000, que vendín nun momento de enaxenación mental.

Combatentes (Calidris pugnax). Toma moi recurtada desde uns 280 m (disparo a pulso)

Sony RX10 III (focal 600 mm)   ISO:200   V:1/250    F:4,5

  A maiores das acuáticas había paxarada interesante:

• Picafollas musicais (Phylloscopus trochilus)
• 1 Papamoscas negro (Ficedula hypoleuca)
• 38+ Lavandeiras brancas (Motacilla alba). Seguramente serían unhas 50 na área controlada e 100+ no total do encoro
• 7+ Lavandeiras amarelas británicas (Motacilla flava flavissima) na cola de Vilaboa. Probablemente eran máis de 10 ex

Lavandeiras amarelas británicas (Motacilla flava flavissima)

Sony RX10 III (focal 600 mm)   ISO:200   V:1/200    F:4,5

  Fixen un collage para que vexades o grao de recurte que tiven que facer en moitas das imaxes debido á grande distancia. En Forcadas hai que currarse moito cada fotografía.

Toma orixinal e recurte aplicado

Uns paxaros ben bonitos as lavandeiras amarelas británicas, todo un clásico a finais do vrao.

Lavandeiras amarelas británicas (Motacilla flava flavissima)

Sony RX10 III (focal 600 mm)   ISO:200   V:1/200    F:4,5

 Igual que o papamoscas negro.

Papamoscas negro (Ficedula hypoleuca)

  A época entre agosto e primeiros de outubro é máis interesante para ver aves limícolas nas Forcadas. Aproveitade. Por certo, chamoume a atención que de varias listaxes que vin de Cecebre non aparecía ningunha limícola, sendo como é un humidal máis "potente". Curioso.