Cambio de tempo

 Esta semana tivemos un cambio de tempo importante. Logo dun mes de agosto extraordinariamente cálido entraron as borrascas atlánticas, co que iso conleva sempre en Galiza: ventos moderados/fortes de compoñente W/SW, temperaturas máis frescas e chuvia. Unhas circunstancias idóneas para a sedimentación de acuáticas migrantes.

Gaivotas típicas descansando na praia de Maniños (Fene)

  Onte ao saír do traballo daba unha volta pola ría de Ferrol, coincidindo cos momentos de choiva máis intensa. Apañei unha boa molladura (a chaqueta do Decathlon era impermeábel anos há).

Praia de Maniños con chuvia persistente

Sony RX10 (focal 70 mm)   ISO:100   V:1/320   F:5,6

 Até primeiros de 2000 as grandes praias da zona estaban cheas con milleiros de gaivotas patiamarelas e escuras ao chegar estas datas. Logo pasou o que pasou e por iso xa non as visito.

  No intermareal de Neda concentrábanse unhas 150 gaivotas grandes. Sen embargo case non había choronas. A que foi acuática máis numerosa na nosa ría (2000-3000 ex invernantes) experimentou un declinio catastrófico na última década. Paradóxicamente coincide no tempo coa entrada en funcionamento da rede de saneamento, como xa comentei. Manda truco.

Intermareal de Neda

    Xunto a EDAR o vento sopraba con forza e movíame moito o paraugas. Neses momentos agradecín que a Sony RX10 III teña selado anti-salpicaduras (por cousas como esa tiña o prezo que tiña).

Gaivotas típicas (Larus michahellis/fuscus/marinus)

Sony RX10 (focal 110 mm)   ISO:200   V:1/400   F:5,6

   Non levaba máis óptica que a cámara, mas puiden ollar algunhas limícolas habituais:

Biluricos das rochas (Actitis hypoleucos) entre gaivotas

  Perto da EDAR había 2 biluricos pativerdes (Tringa nebularia) e 1 bilurico común (Tringa totanus). Puiden fotografar aos primeiros a pesares da cortina de chuvia.

 O bilurico pativerde aliméntase de pequenos alevíns ou camaróns que captura correndo polas canles da baixamar. Un hábito que comparte co bilurico escuro (Tringa erythropus), moito máis escaso. Tendo en conta as difíceis condicións atmosféricas non quedaron nada mal estas dúas fotos:

Biluricos claros (Tringa nebularia)

Sony RX10 (focal 600 mm)   ISO:400   V:1/500   F:4,5

Biluricos claros (Tringa nebularia)

Sony RX10 (focal 600 mm)   ISO:400   V:1/500   F:4,5

  Esta mañá tentei controlar a praia de San Valentín pero o problema dos cans alí é insufrible. Pensar que hai quince anos era ún dos mellores pontos para laro-limícolas da ría... Claro, qué vas esperar cando a mesma concellalía de "medio ambiente" constrúe unha ducha para cans na praia?

 Terminamos cunha fotos de lavandeiras. Pesoume non ter levado a OM-1 e o 400. Cando os paxaros están perto o maior tamaño do sensor nótase no nível de detalle.

Lavandeira amarela (Motacilla flava iberiae)

Sony RX10 III (focal 600 mm)  ISO:800   V:1/250   F:4,5

Lavandeira amarela (Motacilla flava iberiae)

Sony RX10 III (focal 600 mm)  ISO:800   V:1/250   F:4,5

    Ademáis da lavandeira amarela pillei un xuvenil de branca pousado na baranda da ribeira, e deume un "ataque de fotógrafo". Primeiro con ISO alto. 

Lavandeira branca (Motacilla alba) xuvenil

Sony RX10 III (focal 600 mm)  ISO:1600   V:1/200   F:4,5

  Logo con ISO medio, apoiando os brazos na propia baranda. Quizá debín pechar un pouco o diafragma para focar mellor o tramo de baranda á altura da lavandeira. Quedou tanto bokeh que semella editado dixitalmente. Por certo, atentos á velocidade de obturación: 1/50 seg. 

Lavandeira branca (Motacilla alba) xuvenil

Sony RX10 III (focal 600 mm)  ISO:400   V:1/50   F:4,5

   E mais nada por hoxe. Por aquí seguimos.